بشرى بلحاج حميدة تهاجم إتحاد الشغل : الإتحاد يلعب في لعبة

بشرى بلحاج حميدة تهاجم إتحاد الشغل : الإتحاد يلعب في لعبة


نشرت الحقوقية بشرى بن حميدة على فايسبوك التدوينة التالية :

ش نحكي على اتحاد الشغل من غير ما نحس نفسي مذنبة وما يزايدوا علي الجماعة الي توى ولاوا يعترفو به و إلا يقضيوا به في حوايجهم .
الحبيب عاشور الله يرحمه الي نفاه الاستعمار في زغوان سكن في دارنا قبل ما تسكن فيها أمي و أول مرة ريته في حياتي حكى لي الحكاية و حكاها في كتابه و قلت الي أنا في بالي و راني نتفخر بها .
و من بعد و أنا عمري 15 سنة صارت لنا صدمة في عائلتي مازلنا الى توى ما تجاوزناهاش خالي أحمد مبارك رجل مثال في الثقافة و الوطنية و النزاهة مات صغير في حادث مرور بعد حفل أقيم على شرف الحبيب عاشور اثر المصالحة امتاعه مع بورقيبة و رجوعه للحزب الدستوري .
وكبرت وليت طالبة ناشطة في الهياكل النقابية المؤقتة ومعروفة معتدلة و جات العركة بين الاتحاد و الحكومة و هجت وليت ما نفهم شيى وكل اجتماع يقولوا نركحوا نقول لا لالا و الجماعة دايخين في أمرهم كيفاش أنا نصعد و سفيان بن فرحات بعد سنين في برنامج تلفزي فكرني في الحكاية و قدم شهادة كيفاش أنا المعتدلة نهيش في الطلبة و كل الْيَوْمَ و نحن من مظاهرة لمظاهرة .
حاصيلو ولات البوليسية يتبع في وبعد ما هدات الامور دخلت للمدرج نلقى واحد كبير في العمر ظاهر ماهوش طالب دوب ما راني خرج جاوني “الرفاق ” هربوني و مشيت ال دار صاحبتي و ليت ندور في البلاد بسفساري متاع خالتي عزيزة الله يرحمها ام ليلى و @nadia Hakimi .
و غبت أشهر على الجامعة و الادارة قررت إقصائي من الامتحانات لولا استاذي محمد الزين الله يرحمه الي عمل عركة بش عديت الامتحان و نجحت و خذيت أحسن عدد عنده .و خرج في buvette فرحان يوري في العدد الي خذيته .
و في الأثناء و بالسفساري دخلت و حضرت محاكمة النقابيين بعد ما كذبت عل رجال الأمن و قلت لهم راني بنت أحد الموقوفين و أمي ما تحبّش نحضر و نرى بابا موقوف و زاد هبط علي البكاء بكيت .
و من بعد جات احداث الخبز الاتحاد وقف معانا و نحن وقفنا معاه .
حاصيلو عديت عمري أنا نسمع الاتحاد نجري عيني مغمضة الي يقول كلمة يسمع وسخ وذنيه
ما نحكيش على الليلة الي بتها في مركز الأمن في 1985 بعد ما دخلوا علينا في المقر ساحة محمد علي .
و كانوا بش يسيبوني كي عرفوني محامية اما كي فركسوني لقاوا عندي كاسات قالوا اشني قلت لهم عبد الحليم و هو خطاب الحبيب عاشور سألوا العرف قالهم ركب “الخر…”
ما نحكيش على المرحوم حسين بن قدور الي نقعد بحذاه سوايع و يعطيني بعض الملفات إمتاع الطرد و ما يلقى فلوس كان بالسيف بش يخلصني الأربعة فرنك .
و من بعد تعاركوا الجماعة مع بعضهم و عملت انا والأستاذ @Jilani Jeddi قضية ضد القيادة الي تعسفت في المؤتمر و القضية ذابت في المحكمة و رئيس المحكمة سمع مني العجب و قعدت عشرة سنين ما نكلموش .
آخرتها ووقت الثورة انا وMohamedSoudani@ و @voltaire و سعيدة قراش و نحن هايضين في بطحة محمد علي .
المهم برشى حكايات مع الاتحاد فيهم الباهي و فيهم الخايب و لكن كنت ديما نحس المنظمة متاعنا الكل و كي تحك الركائب تلقاه مع الحق على خاطره متاع الناس الكل و مش متاع اَي واحد و يمشيوا لعباد و يقعد هو .
لكن لاول مرة في حياتي ما عقلتشوش و حسّيت الاتحاد يلعب في لعبة مش واضحة لمصلحة اشكون ؟؟و بعيدة على تاريخه و عظامائه